LAOAG CITY – Inlungalong ni Sangguniang Bayan Member Lourdines Dela Cruz iti ili ti Solsona maipapan iti “Kurong-Kurong Ordinance.”
Segun kenkuana, napanunutanna a mangipasa iti nasao nga ordinansa kalpasan nga adda dagiti napaspasamak a panagtatakaw iti kallabes iti ilida kas kadagiti naapit nga irik dagiti sumagmamano a residente.
Gapu iti daytoy, inlawlawagna a masapol a mairehistro dagiti amin a kurong-kurong ken private tricycle iti lokal a gobierno iti ili ti Solsona.
Inbatadna a dagitoy a lugan ket nasken a maikkan ti sticker wenno numero tapno pakalasinan a dagitoy ket nakarehistro iti Munisipio no sadino ket agbalin a permanente ti maalada a numero.
Kunana a mangipakitada laeng ti aniaman a dokumento a mangipaneknek a kukuada daytoy ken no bilang ilakodanto ti lugan ket masapol met laeng a maiyakar dagiti nasken nga impormasion ti baro nga akinkukua.
Innayonna a dumanon iti 50 agingga 100 a pisos ti bayad iti panagparehistro kadagiti kurong-kurong ken private tricycle.
