LAOAG CITY – Naarestar ti maysa a security guard kalpasan a naglabsing iti Republic Act No. 10591 wenno ti Comprehensive Law on Firearms and Ammunition ken ti Election Gun Ban.
Nabigbig ti suspek a ni Mcfrayam Taliboguen y Bago, agtawen ti 22, awanan asawa, ken residente ti Brgy. 12 ditoy siudad ti Laoag.
Basar iti Laoag City Police Station, napan nagresponde dagiti otoridad iti Brgy. 15 ditoy siudad kangrunaanna iti Yols Amusement Center a masarakan iti abagatan a paset ti Holy Spirt Academy of Laoag.
Nakaawat ti impormasion ti kapulisan manipud iti maysa a concern a nakitana ti suspek nga agliklikos iti maysa a carnival nga adda ti paltog iti siketna.
Gapu iti daytoy, tiniliw dagiti otoridad ti suspek no sadinno a naalada ti maysa a Caliber .38 a paltog nga adda ti kargana nga uppat a bala.
Kabayatanna, awan ti naipakita ti suspek nga aniaman a pammaneknek nga adda ti bilegna nga agiggem ti nasao a paltog.
