LAOAG CITY – Mamati ti grupo a Pork Producers Federation of the Philippines a bumaba ti presio ti karne ti baboy inton sumaruno nga uppat a lawas.
Segun iti Presidente ti grupo a ni Rolando Tambago, sobra a ngimmato ti demand para iti karne ti baboy kadagiti naglabas nga holiday maidasig iti holiday demand idi 2023.
Kalpasan ti Christmas ken New Year celebrations, naminsan manen a ngimmato ti demand idi Lunar New Year celebration.
Nupay kasta, kunana a manamnama a bumaba ti demand iti maudi a paset ti Pebrero ken umuna a paset ti Marso kabayatan nga umas-asideg ti Holy Week.
Inbatadna a daytoy ti masansan a mapaspasamak kadagiti merkado ditoy Pilipinas.
Immunan a kitkitaen ti Department of Agriculture ti posibilidad ti panangipataw ti maximum retail price kadagiti karne ti baboy iti merkado gapu ta arig saanen a makontrol pay ti panagngato ti presio.
