LAOAG CITY – Inkalintegan ni Agriculture Secretary Francisco Tiu Laurel Jr. ti desisionda nga agangkat ti sibuyas.
Inbatad ti sekretario a nasken nga ita a laeng a bulan ket addaan ti pito a ribu a tonelada a kinakurang ti sibuyas iti pagilian.
Inlawlawagna nga inaprobaranda laeng ti uppat a ribu a tonelada a pakairamanan ti tallo a ribu a tonelada para iti nalabbaga a sibuyas ken maysa a ribu a tonelada para iti puraw a sibuyas tapno masupusopan ti kinakurangna.
Innayonna nga agingga iti katengngaan ti bulan ti Marso wenno Abril ti harvest season ti sibuyas isu a no saan pay a masolbar ti kinakurangna ita ket mabalin a kumaro pay ti presio dagitoy.
