LAOAG CITY – Inrakurak ni Dr. Maria Lourdes Otayza, Medical Chief II ti Mariano Marcos Memorial Hospital and Medical Center iti siudad ti Batac a kasapulan a suroten dagiti pasiente ti naikeddeng nga oras wenno aldaw iti panagpakonsultar iti nasao nga ospital tapno alisto a maipaay kadakuada ti serbisio medikal.
Daytoy ket kalpasan nga adu kadagiti pasiente nga agturong iti ospital iti saan met a naikeddeng nga oras wenno aldaw a panagpakonsultarda a mangitunda ti pannakaibayagda.
Gapu iti daytoy, inlawlawag ni Dr. Otayza a rumbeng a makikoordinar a nasayaat dagiti pasiente tapno maliklikan a nabayag ti panagtalinaedda iti balay-pagagasan ken saan a masayang dagiti oras dagitoy nga agur-uray.
Mainaig iti daytoy, manarimaan ti panangadalda seknan iti QR Code Health Portal para iti al-alisto a panagpakonsultar dagiti pasiente.
Naammoan a ti QR Code Health Portal ket maysa a wagas tapno ditoy nga agkiddaw wenno gumatang dagiti pasiente kadagiti agas, panangkita iti resulta ti laboratorio, resulta ti X-ray ken dadduma pay.
