LAOAG CITY – Inlawlawag ni Commission on Elections Committee on Kontra Bigay chairperson ken Comm. Ernesto Maceda Jr. a saan laeng a dagiti registered voters ti kualipikado a mangipila ti reklamo kontra kadagiti pulitiko nga aglablabsing iti Fair Election Act.
Inbatad ni Comm. Maceda nga uray ordinario nga indibidual a nakasaksi ti panaglako ti butos wenno panangawat ti bayad manipud iti kandidato ket mabalin nga ag-report.
Inlawlawagna a daytoy ket kas maipada ti panangipila ti kaso a saan laeng dagiti adda iti legal age ti mabalin nga agisubmitir ti complaint no di ket uray asinoman a makaammo iti napasamak.
Kunana a ti napateg ket adda ti iggemna nga ebidensia kas ti video, pictures, salaysay, dokumento ken dadduma pay.
Iti agdama, adun ti iggemda a reklamo ngem amin dagitoy ket nasken a dumalan iti naiget a panangberipikar.
Naammoan a ti sumagmamano a maak-akusaran ti vote buying ket dagiti prominente a tao ken addan ti affidavit metten ti compalinant kadagitoy.
