LAOAG CITY – Balligi a naarestar babaen kadagiti kameng ti Philippine National Police iti ciudad ti Batac ti Top 3 most wanted person ditoy Ilocos Norte.
Nabigbig ti akusado a ni Maynard Manglal-lan y Tacut, agtawen ti 31, naasawaan, driver/operator iti gobierno lokal iti ciudad ti Batac ken residente iti Sitio Tungbol, Brgy. Bil-loca iti metlaeng nasao a ciudad.
Naarestar ti akusado babaen ti bileg ti warrant of arrest nga inparuk-at ni Hon. Felix Gabriel Salvador, Presiding Judge iti Regional Trial Court, Branch 17 First Judicial Region, iti ciudad ti Batac a napetsaan ti Marso 5, 2025 gapu iti kaso na a panaglabsing iti Republic Act 9165 wenno Illegal Possession of Dangerous Drugs ken ti Illegal Sale of Dangerous Drugs.
Nairekomendar ti 200 a ribo a pisos a piyansa na para iti kaso na nga Illegal Possession of Dangerous Drugs idinto nga awan ti nairekomendar a piyansa na para iti kaso na nga Illegal Sale of Dangerous Drugs.
Iti agdama, nagtalinaed ti akusado iti Philippine National Police iti ciudad ti Batac ken manamnama a maidatag iti Korte iti kabiitan a panawen.
