LAOAG CITY – Maysa a nalatak nga international coffee chain ti nangirubuat ti kape nga addaan ti pork flavor idiay China.
Mapagsasaritaan iti online debate no naimas wenno saan ti nabirngasan a naidumduma a kape ita idiay China, ti braised pork coffee.
Inawagan nga “Abundant Year Savory Latte,” nairubuat daytoy idi Pebrero 10 kagiddan ti Chinese New Year celebration.
Mabasa iti description ti coffee chain, ti “Abundant Year Savory Latte” ket kombinasion ti expresso shot, Dong Po pork sauce, steamed milk ken slice ti braised pork.
Ti Dongpo pork wenno am-ammo pay kas Dongpo rou ket traditional Chinese cuisine dish a nangrugi pay idi Song Dynasty.
Ti Dongpo pork ket ar-aramiden iti babaen ti panag-braise ti pork belly iti soy, rice wine, asukar, laya ken dadduma pay a ramen.
Ti nabayag a proseso ti panagluto ket nagresulta iti nalamuyot, naraman ken juicy a karne.
Basar iti coffee chain, inaramidda daytoy a kape tapno bigbigen ti traditional new year customs ti China.
Gudua ti opinion dagiti nakaraman iti pork flavored coffee. Sumagmamano kadagitoy ket nagustoanda ti “sweet and salty” a raman daytoy.
Kaadduan met kadakuada ket saanda a nagustoan. Basar kadakuada ket saanda a nagustoan ti angot ti karne ken raman ti bean curd daytoy.
Agbalor ti 68 Yuan wenno katukad ti P528 ti maysa a baso ti kape. Limited edition laeng daytoy ken available laeng idiay China iti bulan ti Pebrero.
