LAOAG CITY – Inpetteng pay dagiti kaalyado ti dati a Presidente Rodrigo Duterte a nasken koma a naipakita nga umuna ti warrant of arrest kagiddan ti panangkwestionarda no apay a saan a napastrek uray dagiti abugado ni Duterte.
Kwinestionaran pay ni dati nga Executive Secretary Salvador Medialdea ti ICC prosecutor general ti kwestionable a warrant of arrest gapu ta saan pay laeng a a naibaga no ania a kaso ti sangsangoen ti dati a Presidente.
Inbatadna pay a masapol nga ammo ti prosecutor general ti due process kagiddan ti panangibagana a sumursurot dagiti otoridad iti International Criminal Court a saan met a miembro wenno awan ti pakainagan ti Pilipinas gapu ta nagikkaten daytoy sipud pay idi 2019.
Kuna met ni dati a chief presidential legal counsel Atty. Salvador Panelo a saan a nainkalintegan ti pannakatiliw ni Duterte gapu ta ti naggapoan ti warrant of arrest ket iti ICC ken saan a napalubosan dagiti abugado ti dati a Presidente a makasarita daytoy.
Gapu iti daytoy, inpettengna nga agsungbat ti arresting team ken uray dagiti public officials a nangibilin iti pannakatiliw ni Duterte.
Mismo pay a ni dati a Presidente ti nangkwestionar iti pannakatiliwna ken sinaludsodna no ania a krimen ti inaramidna ken no apay a naipan isuna iti Villamor Airbase.
Sinaludsodna pay a mismo iti prosecutor general no binasana met laeng ti kaso apaman nga inpatungpalna ti pammilin a maarestar daytoy.
Kabayatanna, naruay met dagiti supporters ti dati a Presidente Duterte ti nagtitipon tapno ipakita ti suportada kenkuana manipud iti Ninoy Aquino International Airport ken uray iti Villamor Airbase.
Namunganay daytoy iti nadara a drug war ti dati nga administrasion Duterte a nakatayan ti naruay a tattao ken nangitunda iti pamilia dagiti biktima a mangipila ti reklamo kontra iti dati a Presidente.
