LAOAG CITY – Siyam nga “house and lots” ti inpaima ti Provincial Government of Ilocos Norte wenno PGIN babaen iti Phase 1 ti Adigi Housing Project.
Segun ken ni Mrs. Evalaudia Duyor, Officer In-charge ti Provincial Assessor’s Office, dagiti naiyawat kadagiti maseknan ket ti titulo ti lote pakairamanan ti “tax declaration” a nainaganen kadagiti maseknan.
Naisubmitir metten dagiti nagnaganda iti Pag-ibig Fund nga in-inut a pagbayadan da.
Namnamaen ni Duyor nga adda pay ti sabali a tallopulo nga house and lots ti mailako ti gobierno probinsyal ita a tawen gapu ta ado dagiti agplaplano nga agaplikar a gumatang.
Kunana a dagiti mabalin a manggundaway iti nasao a programa ket masapul a miembro ti Pag-ibig Fund.
Innayonna a no ub-ubing dagiti manggundaway iti nasao a programa ket basbassit ti pagbayadna iti binulan ngem at-atiddog a panawen ti panagbayadna.
Kabayatanna, no natataengan ket ab-ababa a panawen ti panagbayadna ngem dakdakkel ti bayadanna iti binulan.
Maipalagip a nairubuat ti Adigi Homes Program bayat ti panagbalin ni Senador Imee Marcos a congresswoman iti maikadua a Distrito ti probinsia a mangipaay ti gundaway kadagiti awanan ti balay a maaddaan ti kabukbukudan a balay iti nababa a presyo.
