LAOAG CITY – Inruar ni House Deputy Majority Leader Francisco Paolo Ortega V dagiti nagan ti pito a dadduma pay a nakaawat ti confidential funds ni Vice President Sara Duterte.
Inbatad ti Kongresista manipud iti probinsia ti La Union a sumagmamano kadagiti rumrummuar a nagan ket isuda Dodong Alcala, Dodong Bina, Dodong Bunal, Dodong Darong, Dodong S. Barok, Jay Kamote ken Miggy Mango.
Inlawlawagna a ti nasao a panangibutaktakna ket mabalin a mausar ti impeachment ti Bise Presidente.
Kunana a nangisubmitir met ti Department of Education nga idadauloan ti Bise President idi ken ti Office of the Vice President kadagiti dokumento nga addaan ti biddot a petsa, pirma nga awan ti naganna ken saan a mabasa a nagan tapno ma-justify ti panangiruar ti confidential funds idi 2022 ken 2023.
Maipalagip a immuna a rimmuar ti nagan da Mary Grace Piattos ken Xiamoe Ocho nga awan ti rekord dagitoy iti Philippine Statistics Authority.
Inpetteng ni Ortega a saan daytoy nga aksidente laeng no di ket maibilang a nalawag a pananggastos ti pundo ti gobierno gapu iti peke a nagan, liquidation ken panagsungbat.
