LAOAG CITY – Makikokoordinar ti Presidential Communications Office kadagiti maseknan nga ahensya ti gobierno para iti maiyannatop nga addang kontra kadagiti adda iti likudan ti panagraira ti saan nga usto nga impormasyon wenno peke a damag.
Saan a linged iti Malakanyang ti panagraira ti fake news kalpasan ti pannakaarestar ni dati a Presidente Rodrigo Duterte.
Segun ken ni Palace Press Officer Usec. Claire Castro, ad-adalen da ti maiyannatop nga addang tapno maisardengen ti kastoy nga aramid.
Immunan nga inbatad ti National Bureau of Investigation ken Philippine National Police nga im-imbestigaren ken addan dagiti nakasagana a plano da tapno kamaten dagiti agiwarwaras ti fake news.
Iti biang ti Presidential Communications Office, kuna ni Castro nga agtultuloy ti panangikarkarigatan da a malabanan ti disinformation iti babaen ti press briefing ken live discussion tapno maamoan dagiti tattao no ania ti pudno ken saan.
Kiniddaw na pay ti tulong ti media para iti fact-checking dagiti rumrumuar nga impormasyon kangrunaan na iti internet.
