LAOAG CITY – Inlawlawag ti Presiding Officer ti Sangguniang Panlungsod ditoy siudad ti Laoag a saanen a masapul ti panangputar ti ordinansa para iti pannaka-libre ti panagbuya ti sine dagiti senior citizens ken adda ti rangkap ti bagina ditoy siudad.
Segun kenkuana, saanen a masapul ti ordinansa para iti daytoy a banag gapu ta maymaysa ti mabalin a pagsinean dagiti maseknan ditoy siudad ti Laoag.
Inlawlawagna nga imbes nga ordinsa ti maipasa ket Memorandom of Agreement wenno MOA lattan ti aramiden ti lokal a gobierno tapno al-alisto ti panakaaipaay ti libre a panagbuya ti sine dagiti senior citizen ken adda ti rangkap ti bagina.
Maipalagip a daytoy nga addang ti konseho ket tapno maikkan ti gundaway dagiti senior citizen ken adda ti rangkap ti bagina a makabuya kadagiti nagduduma a movies a pampaikkat ti stress dagitoy ken kas tulong a pakalag-anan dagiti benepisiario.
Immuna iti daytoy, nairakurak a manamnama nga aglukat ti dakkel a mall ditoy siudad ti Laoag inton Mayo 23 ita a tawen.
