LAOAG CITY – Nangiruar ti Bangko Sentral ng Pilipinas (BSP) ti memorandum para kadagiti BSP-supervised financial institutions (BSFIs) tapno papigsaen ti surveillance ken monitoring systems kontra iti panaggatang ken panaglako ti butos nangruna ket umas-asidegen ti 2025 National and Local Elections.
Ti Bangko Sentral ng Pilipinas Memorandum No. M-2025-006 a napirmaan idi Marso 23, 2025 ket mangibagbaga a mangaramid ti addang dagiti institusion tapno labanan ti biddot a panagusar kadagiti digital channels kas ti online banking ken mobile wallet applications para iti panaggatang ken panaglako ti butos.
Malaksid iti daytoy, inbilin ti Bangko Sentral ng Pilipinas a siguradoen a dagiti customer onboarding processes, fraud management systems (FMS) ken account and transaction monitoring settings ket kabaelanna a lappedan ti posible a panagadu dagiti peke nga account ken transactions iti panawen ti eleksion.
Insingasing ti Bangko Sentral ng Pilipinas a bantayan dagiti senyales ti anomalia kas ti kellaat a panagngato ti registration ti account kadagiti lugar nga am-ammo iti panaggatang ken panaglako ti butos, dadakkel a cash transactions iti panawen ti eleksion, naidumduma a pattern ti transaksion ken nangato a volume wenno balor iti cash-in wenno cash-out channels.
Ti memorandum ti Bangko Sentral ng Pilipinas a kapada dagiti immuna a memorandum kadagiti naglabas nga eleksion ket sungbat iti panawagan ti Commission on Elections (COMELEC) iti babaen ti Resolution No. 11104 nga inruar idi Enero 28, 2025 para iti naig-iget a mekanismo kontra iti panaggatang ken panaglako ti butos.
Naiget ti pannakibinnulig ti Bangko Sentral ng Pilipinas iti Commission on Elections ken Philippine National Police (PNP) tapno masolbar dagiti election-related cases iti panaggatang ken panaglako ti butos babaen kadagiti financial platforms.
