LAOAG CITY – Inrakurak ti Bureau of Internal Revenue-7 a nagbalin a napintas ti performance ti Central Visayas kalpasan a naartapanna ti target a revenue collection iti napalabas a dua a tawen.
Daytoy ti nagbalin a sungbat ni Officer In Charge Regional Director Antonio Ilagan no sadinno nga inrakurakna a dumanon iti P42.6B ti actual collection-da idi 2023 wenno nangatngato ti 1.65% maidasig iti P41.9B a target.
Idi tawen 2024 ket dumanon iti P49.17B ti actual collection maidasig iti P48.8B a target.
Inlawlawag ni Ilagan ti kinapateg daytoy ket saan laeng idiay Cebu no di ket iti intero a pagilian a Pilipinas.
Mangnamnama daytoy a magun-od ti collection goal ita a tawen a P55B iti babaen kadagiti programa kas ti panangmonitor iti compliance kadagiti tax payers.
Inallukoyna dagiti tax payers a saanen nga iyuray pay ti deadline tapno maliklikan ti aniaman a problema.
Kabayatanna, uray saan pay a nakaipaay ti eksakto a datos, inbutaktakna nga adun ti naipaserrada nga establishimento iti napalabas a tawen gapu iti tax violation ken sumagmamano ita a tawen.
