LAOAG CITY – Inadmitir ti Schools Division ditoy ciudad ti Laoag nga adda ti panagkurang ti security personnel da iti tunggal pagadalan ditoy ciudad.
Daytoy ti inbatad ni Mr. George Emman Manuel, administrative officer ti Department of Education ditoy ciudad kalpasan iti napasamak a pammagkong iti Ilocos Norte National High School.
Kuna na a kanayon a mapagsasaritaan ti nasao nga institusyon ti nayun a security personnel ngem inpalgak na nga awan ti available a plantilla position ken budget a makaanay tapno mang-hire kadagitoy.
Inlawlawag na a daytoy ti rason nu apay a saan a mainspeksyon a saggaysa dagiti personel ti bag dagiti estudyante sakbay da a sumrek.
Innayon na a dagiti laeng makita da a nakakas-kasdaaw ken banag a mangtrigger kadakwada ti inspeksyunen da.
Kabayatanna, inbatad ni Manuel a saan da pay a makaipaay ti pinal a report mainaig iti napasamak a pammagkong iti nadakamat a pagadalan a nakairamanan ti maysa a grade 9 ken grade 10 student, gapu ta iyur-uray da ti report manipod iti Philippine National Police nga isu ti nakaipaimaan ti hurisdiksyon nga agimbestigar iti kaso.
Nupay kasta, kuna na a nangiwayat da ti bukod da nga imbestigasyon ken rumrumuar nga adda ti pakainaigan ti napasamak iti bullying ken fraternity.
Inrakurak na a karaman to kadagiti maadal ket no ania dagiti pannusa a maipataw ken no siasinno ti rumbeng a mapatawan.
Iti agdama, inpakaammo ni Manuel a nakarwaren iti ospital ti biktima ken addan iti natalged a kasasaad na idinto a ti nangbagkong ken dagiti nakaimatang iti pasamak ket manarimaan a dumaldalan ti alternative deliver mode tapno maprebentaran wenno malimitaran ti marikrikna da a trauma.
