LAOAG CITY – Maitudtudo ni Barangay Tanod Ramon Cito Alaber wenno ad-adda nga am-ammo iti awag nga Ampong a nangdadael dagiti lugan dagiti agbatbatok ti pukpuklo iti Barangay Dilavo iti ili ti Pasuquin.
Segun ken ni Barangay Chairman Cesar Ulnagan, ti Barangay Dilavo iti ili ti Pasuquin, apaman a naawatna daytoy a problema dagiti kabarangayanna ket insigidana daytoy a trinatar babaen iti panangidasarna daytoy a banag iti sangoanan mismo ni Barangay Chairman Jesus Agbalog, ti Barangay Davila iti nasao met laeng nga ili.
Inbatadna a daytoy ket kalpasan a maipagarup nga iniwa-iwa ni Barangay Tanod Ampong dagiti tallo a motorsiklo ken tallo a kurong-kurong dagiti agbatbatok ti pukpuklo a kabarangayanna.
Inlawlawagna a kalpasan ti pannakisarsaritana ken ni Kapitan Agbalog ket awan metten ti maiyurayna a tignay daytoy tapno masolbar ti problema dagiti kabarangayanna.
Gapu iti daytoy, kunana a maminsannanto manen a kasarita dagiti maseknan a kabarangayanna no ania ti kalikagumda a mapasamak no ipursigeda nga agipila ti reklamo kontra ken ni Barangay Tanod Ampong.
Mainaig iti daytoy, naiget a naglikudan ni Barangay Tanod Ampong ti maipabpabasol kenkuana.
Kunana a manarimaan ti panagpintana iti pagtaenganda idi aldaw a napasamak iti pannakadadael dagiti lugan dagiti agbatbatok ti pukpuklo.
Inpalgakna a saanna met a masinunuo no apay isuna ti maitudtudo nga akin-aramid iti nasao a banag.
Kabayatanna, naammoan a daytoyen ti maikadua a daras a nadadael dagiti lugan dagiti agbatbatok ti pukpuklo iti Barangay Dilavo iti ili ti Pasuquin no sadinno a napitpit ti tangke ken naperdi ti pagtarayan ti gasolina dagiti lugan dagitoy iti napalabas a tawen.
