LAOAG CITY – Maysa a naidumduma nga orchestra ti napadayawan ti Guinness World Records ti titulo a “Most concerts by a vegetable orchestra” kalpasan a nagpatukar daytoy ti 344 a concerts iti uneg ti 27 a tawen usar laeng dagiti instrumento a naaramid iti nateng.
Ti 11-member Vegetable Orchestra ket nabukel idi 1999 idiay Vienna, Austria idi nagkakadua dagiti musikero manipud iti nagduduma a tay-ak tapno agpartuat ti tukar babaen kadagiti nateng.
Segun kadakuada, nangrugi laeng daytoy iti maysa nga angaw ngem saan a nagbayag ket nagbalin a maysa a naisangsangyan a kita ti arts.
Manipud iti carrot nga inaramid a flute agingga iti leek a maar-aramid a mandolin, perpekto itan ti wagas dagitoy iti panagpatukar babaen ti nateng ngem saan nga agbayag dagiti instrumentoda.
Nagpaut laeng dagitoy iti uneg ti innem nga oras sakbay a nangrugi a mabangles wenno mapukaw ti sukogna.
