LAOAG CITY – Pudno a ti kinarigat ket saan a lapped no kayat ti makaturpos iti panagadal ken saan a rumbeng nga isardeng ti agarapaap kalpasan ti pannakapaay.
Daytoy ti napaneknekan ni Dra. Frances Danielle Pascua, residente iti ili ti Paoay ken maysa kadagiti 12 a nakapasa ti Physician Licensure Examination manipod iti Mariano Marcos State University iti ciudad ti Batac.
Inlawlawag ni Pascua a daytoyen ti maikadwa panangala na ti Physician Licensure Examination no sadinno nga idi Oktubre iti napalabas a tawen nga immuna a panageksamen na ket saan a nakapasa isut gapu na nga inulit na ita a bolan nga isu metten ti pannakaipasa na.
Inbatad na a ti kurso nga innala na idi agenrol iti kolehiyo ket Bachelor of Science in Biology ngem inadmitir na nga awan pulos iti panunot na ti mangala iti medisina.
Nupay kasta, kabayatan ti kaadda na iti 3rd year ken 4th year iti kolehiyo ket isu metten ti panagbaliw ti panunot na no sadinno nga inarapaap nan ti agbalin a doktor.
Iti baet daytoy, saanna a dagus a naituloy ti nangala iti medisina gapu iti kaawan ti kwarta a gastusen na ken kinasarita payen dagiti nagannak na a saannan nga itultuloy gapu ta awan metlaeng ti pangtustos na iti daytoy.
Ni Pascua ket scholar ti Department of Science and Technology (DOST) iti panagadal na iti kolehiyo isut gapuna a kas panangsubad na iti daytoy ket nagserbi kas science teacher iti senior high school iti Pinili National High School.
Iti baet a kinasarita dagiti nagannak na a saannan nga ituloy ti mangala iti kina-medisina ket saan latta a napukawan ti namnama ken inkarkararag na nga adda ti scholarship program a mabalin na manen a gundawayan.
Napalalo ti ragsak ni Pascua idi maala daytoy kas scholar ti Department of Health ken awan ti sinayang na a gundaway agingga a nagturpos gapu ta ti kangrunaan a rason no apay a nangala iti medisina ket tumulong kadagiti tattao.
Inpakaammo ni Pascua a dagiti nagannak kenkuana ket agpada nga agpapaay iti gobierno.
Mainaig iti daytoy, inpalgak ni Pascua a kas scholar ti Department of Health ket agserbi kas Doctor to the Barrio ngem saanna pay a masigurado no sadinno a lugar ti pakaikabilan na.
