LAOAG CITY – Sinungbatan ti Philippine National Police (PNP) ti political ads ni Senador Imee Marcos kaduana ni Vice President Sara Duterte no sadinno a nailadawan iti agmaris ti nangisit a situasion ti pagilian gapu kadagiti krimen ken kinaranggas.
Iti Malacañang press briefing, inbatad ni Philippine National Police Director for Police Community Relations Major General Roderick Alba, iti baet a saan a mailibak nga adda ti sumagmamano a dadakkel a krimen a saan nga insigida a maresolbar ket saan met daytoy ti mangipakita ti pakabuklan a situasion ti seguridad iti pagilian.
Pammaneknek ti sumaysayaat a situasion ti panagbaba iti 26% ti crime rate iti pagilian maidasig iti napalabas a tawen.
Inbatad ni Alba, iresrespetar ti Philippine National Police no aniaman ti mairuruar nga estoria iti bangir a partido ngem kitaen ti pudno a datos.
Iti baet daytoy, inpasingked ni Alba nga agtultuloy ti panagtrabaho ti pulisia tapno malappedan ti aniaman a klase ti krimen ken dagiti panaglabsing.
