LAOAG CITY – Imbestigaran ti Commission on Elections dagiti report nga adda ti sumagmamano a kandidato ti nagkampania idi Biernes Santo uray naiget daytoy a maipawil.
Inbatad ni Commission on Elections Chairman George Erwin Garcia nga adda ti uppat a kandidato ti imbestigaranda gapu iti posible a panaglabsing iti campaigning ban idi Huebes ken Biernes Santo.
Inlawlawagna nga adu a kandidato ti nagusar iti social media tapno agbalin a visible dagitoy iti panawen ti campaign ban.
Immunan nga inrakurak ni Garcia a karaman a maipawil nga aramiden ket ti panangipaay ti taraon ken inumen kadagiti pabasa.
Maipawil pay ti panangorganisar dagiti paay-ayam kas ti basketball.
Kabayatanna, tingtingitingen ti Commission on Elections dagiti insidente ti panaggatang ti butos idiay Quezon City iti babaen ti panangipaay ti card nga arig maysa daytoy nga ATM card.
