LAOAG CITY – Nangipaay a dagus ti tribute dagiti world leaders para ken ni Pope Francis kalpasan a nairakurak ti pannakatay na.
Pimmusay ti santo papa, maysa nga aldaw kalpasan ti panagpakita na iti St Peter’s Square tapno kablaawan ti “Happy Easter” dagiti rinibo a deboto ti Romano Katoliko.
Karaman kadagiti nangipaay ti tribute ket ni French President Emmanuel Macron no sadinno nga inawagan na ti santo papa kas “man of humility”.
Indiskribir met ni Scottish First Minister John Swinney ni Pope Francis kas “voice for peace, tolerance ken reconciliation”.
Para met ken ni Swiss President Karin Keller-Sutter, ti sant papa ket “great spiritual leader’ ken awan pulos ti pannakabannog na a mangitandudo iti adbokasya na para iti kapia.
Mainaig iti daytoy, inrakurak ni European Parliament President Roberta Metsola a ti makaay-ayo nga isem na ti nakaalaan na ti puso dagiti minilyon a tattao iti intero a lubong.
Dinayaw met ni Israeli President Isaac Herzog ti “boundless compassion” ti santo papa.
Ni Pope Francis ti kaunaan a Latin American leader ti Roman Catholic Church.
Maipalagip nga iti laeng napalabas a lawas ket nagpakita iti publiko ni Pope Francis, agtawen ti 88-anyos ken nagyamanan na ti medical team a nangasikaso kenkuana iti lima a lawas a pannakai-confine na iti ospital gapu iti double pneumonia.
