LAOAG CITY – Immanamong dagiti Micro, Small, and Medium Enterprises (MSMEs) dItoy ciudad ti Laoag iti pannakaikeddeng ti renta dagiti tent a mausar tapno mapalubosan da nga aglako iti Aurora Park.
Daytoy ti napagnunumoan kabayatan ti naisayangkat a public hearing iti session hall a nakipasetan dagiti akinbagi kadagiti nagduduma a pasdek negosio ditoy ciudad.
Segun iti maysa a kameng ti konseho, adda ti napasamak a panagsinnukat ti ideya ken suhesyon no ania ti aramiden da a pagsayaatan ti kaadwan.
Immunan nga inpakaammo na nga adda ti negosyante a nangkumpirmar nga adda ti maysa a pribado nga indibidwal nga agkolkolektar ti rental fee kadakuada.
Inrakurak na a saan a rumbeng a maitultuloy ti kastoy pasamak gapo ta nabayagen a napagbalin a libre ti panagpwesto kadagiti public space.
Namnamaen na a babaen iti daytoy nga addang ket masolbaren ti nabayagen a problema a mapaspasamak ditoy ciudad.
Innayon na a dagiti napagnunumoan iti public hearing ket maidatag ita nga aldaw kabayatan ti regular session.
