LAOAG CITY – Nagpanawagan ti Philippine National Police kadagiti residente ditoy probinsia nga agbalin a responsable kadagiti tarakenda kas ti aso ken pusa ken dadduma pay a dingwen tapno maliklikan ti pannakadesgrasia dagiti siklista a dumalyasat ditoy Ilocos Norte ita nga aldaw, Abril 24.
Segun ken ni P/Lt. Col. Jephre Taccad, Chief Provincial Operation Management Unit ti Ilocos Norte Police Provincial Office, dumanon ti agarup 500 a siklista ti makipaset iti Tour of Luzon no sadinno a mangrugida iti ili ti Paoay Church nga agturongda iti ili ti Pagudpud.
Inbatadna a daytoy nga aktibidad ket imatonan ti Metro Pacific Tollway ken Top World Philippines.
Inlawlawagna a dumanon iti 159 a kilometro ti panagbisikleta dagiti 17 a grupo dagiti siklista.
Innayonna a nakasagana ti nailian a pulisia ken ti medical team a mangipaay ti seguridad para kadagiti makipaset iti nasao nga aktibidad.
