LAOAG CITY – Tumultulong ti US Embassy iti iseserrek dagiti negosiante manipud Estados Unidos a maaddan ti negosio ditoy Ilocos Norte.
Segun ken ni Mrs. Rona Leigh Bueno, mangidadaulo ti Invest Office ti Provincial Government, nakitaripnong ni Mr. Ryan Essman, Economic Officer ti US Embassy kada Acting General Manager Cipriano “Perry” Martinez ti Ilocos Norte Electric Cooperative ken ni INEC Director Nikki Pilar pakairamanan dagiti pannakabagi ti nagduduma a negosio ditoy probinsia.
Inbatad na a kangrunaan a sinaludsod ti economic officer ti US embassy no kasano ti agnegosio ditoy probinsia, ania dagiti adda nga industria ken no ania dagiti masirsirmata a makita iti masangoanan.
Kunana a daytoy ti resulta ti kinapursigido ti Invest Office nga agallukoy kadagiti umay mangestablisar ti negosio da ditoy probinsia pakairamanan ti panagturongda idiay Hawaii iti kallabes.
Inlawlawag ni Bueno a kiniddaw da ti tulong ti economic officer tapno maikonektar ti opisina da iti umiso a “chamber” wenno grupo dagiti negosiante idiay Estados Unidos a mabalin a pangidiayaan da iti Ilocos Norte a sumaruno a pangestablisaran da ti negosioda.
Naragsak a nangipakaammo ni Bueno a nakita ti kaadda ti napintas a masakbayan ti turismo ditoy probinsia gapu ta ado dagiti turista manipod idiay Estados Unidos.
