LAOAG CITY – Inimbitaran ti Sangguniang Panlalawigan ti sumagmamano a departamento ken ahensia ti gobierno nga agatendar inton sumaruno a session mainaig iti mapaspasangasangan a 2025 Palarong Pambansa.
Segun ken ni Sangguniang Panlalawigan Member Medeldorf Gaoat, Chairman ti Committee on Health ditoy probinsia, kalikagum a maammoan ti hunta probinsial ti panagsagsagana dagiti maseknan a departamento ken ahensia ti gobierno para iti nasao a naindaklan nga aktibidad.
Inbatadna a dagiti kangrunaan a maimbitaran ket dagiti opisina manipud iti Provincial Tourism Office, Provincial Sports and Development Office, Bureau of Fire Protection, Philippine National Police, Department of Education – Schools Division Office iti siudad ti Batac ken ditoy siudad ti Laoag.
Maipalagip a mangrugi ti Palarong Pambansa inton Mayo 24 agingga iti Hunio 2 no sadinno nga host ti probinsia ita a tawen.
