LAOAG CITY – Inpannakkel nga inpadamag ti Malakanyang a pinalawa pay ti Philippine Health Insurance Corporation (PhilHealth) ti benepisio para kadagiti pasiente nga addaan sakit a Malaria.
Inbatad ni Palace Press Officer USec. Claire Castro a daytoy ket kas sungbat ti gobierno iti panawagan ti World Health Organization nga agkaykaysa kontra iti sakit a Malaria.
Inbatad ni Castro a manipud iti dati a P780, naipangato ti P1,170 ti benepisio para iti diagnostic test, agas ken konsultasion.
Sakupen payen ti panagpaagas iti uncomplicated malaria iti babaen ti P5,460 a package iti primary care ken agingga iti P7,800 para kadagiti pasiente a kasapulan a maospital.
Inbatad ni Dr. Edwin Mercado ti PhilHealth, ti baro a malaria package ket paset ti ad-adda a naipaigetan nga addang tapno ad-adda nga al-alisto, nalaka ken komprehensibo ti serbisio iti salun-at para iti amin.
Gagem daytoy ket tapno suportaran ti target ti pagilian iti pananglapped ti malaria inton 2030.
Basar iti Palasyo, naiget ti panangtutok ti administrasion Marcos iti pagsayaatan ken salun-at ti tunggal Pilipino nangruna iti pangta dagiti sakit kas ti malaria.
