LAOAG CITY – Inrakurak ni Bombo International Correspondent Rev. Father Ezechiele Gamboa iti Rome, Italy a masapol nga iti uneg ti siyam nga aldaw ket makapilin dagiti cardinals ti baro a santo papa.
Daytoy ket kagiddan ti panangrugin ti conclave ita nga aldaw tapno agpili ti baro a santo papa a kasukat ti pimmusay a ni Pope Francis.
Segun ken ni Father Gamboa, 44 a daras nga agbotos dagiti cardinals no sadinno a mamindua da nga agbotos iti bigat kasta met iti malem, ken no addan ti puraw nga asok a rumuar manipod iti Sistine chapel ket mangipasimudaag nga addan ti napili a baro a santo papa.
Inlawlawag na a saan a pudno ti agwarwaras nga espiritu santo ti agpili no di ket asistiran na laeng dagiti cardinals nga agbotos no siasinno ti rumbeng a mapili a baro a santo papa.
Innayon na a kalpasan ti 44 a daras a panagbotos dagiti cardinals ken awan pay ti mapili a baro a santo papa ket no siasinno dagiti dua a kangrunaan a napagpilian kabayatan ti panagbotos ket isuda laengen ti pagpilian dagiti cardinals.
Nupay kasta, kuna ni Father Gamboa nga uray adda ti mapili no saan a kayat nga awaten ti maseknan ket balbaliwan da manen ti agbotos agingga nga adda ti umannugot a sumaruno a baro a santo papa.
Maipalagip nga adda laeng ti 133 a cardinals a kwalipikado nga agbotos para iti baro a santo papa.
