LAOAG CITY – Nangrugin ita nga aldaw ti full deployment dagiti pulis iti intero a pagilian kas paset ti panagsagsagana para iti kinatalged, kinapudno ken nakappia nga eleksion.
Inbatad ni Philippine National Police Chief General Rommel Francisco Marbil, dumanon iti 163 a ribu a pulis ti naiwaras tapno bantayan dagiti polling precinct, napapateg a pasilidad ken dadduma pay a lugar nga adda ti pakainaiganna iti eleksion.
Kunana a gagem daytoy a magun-od ti “zero violence” inton eleksion kagiddan ti panawagan a pabus-oyan dagiti umili a makabutos nga awan ti panagbuteng ken panagdanag.
Innayon ni Marbil nga awan ti mamonmonitorda a seryoso a pangta iti seguridad ita nga eleksion ngem 100% dagitoy a nakasagana nga agresponde iti aniaman a posible a riribuk wenno krimen a mabalin a mapasamak iti mismo nga aldaw ti panagbubutos inton Lunes, Mayo 12.
