LAOAG CITY – Nagtalinaed ti 36 ti bilang ti nairekord nga areas of concern a naiget a banbantayan ti Commission on Elections.

Segun ken ni Commission on Elections Chairman George Garcia, awan pay ti inpaay ti Philippine National Police a baro nga update a mabalin a mairaman kadagiti areas of concern sumagmamano nga aldaw sakbay ti panagbubutos.

Iti baet nga adda ti namonitor ti Commission on Elections idiay Zamboanga Sibugay a sumagmamano a minor incident, saan met daytoy a makaapektar iti seguridad ti intero nga ili.

Inbatad ni Garcia, bassit laeng dagiti mairekrekord nga insidente nga adda ti pakainaiganna iti eleksion ken mangnamnama isuda a saanen a manayonan ti bilang dagiti lugar a maibilang nga areas of concern.

Iti agdama, agtultuloy ti panagsagsagana ti Commission on Elections para iti 2025 Midterm Elections kabayatan ti panangmonitorda kadagiti sumagmamano a lugar ditoy pagilian nga adda ti nabara a panagbinnalubal iti pulitika kangrunaanna iti lokal a posision.