LAOAG CITY – Inbatad ni Sang Panlalawigan Member-elect Joefrey Saguid a kalikagom na a mapatibker ti langen-langen dagiti barangay, munisipyo ken intero a probinsya.
Daytoy ket gapu ta isu ti patienna a tulbek tapno ad-adda pay nga agprogreso ti Ilocos Norte.
Ni Saguid ket nagun-od na ti maikadwa a kangatoan a botos iti kina-bokal iti maikadwa a distrito iti kalepleppas a 2025 Midterm Elections.
Inpalgak na a babaen kadagiti adon a kapadasan na kas ama iti ili ti Dingras ket isu ti balunen na iti panagserbi na iti Sang Panlalawigan tapno suportaran dagiti nagduduma a programa ken proyekto ti gobierno probinsial.
Kabayatanna, nagyaman ni Saguid kadagiti pada na a mayor kangrunaan na iti maikadwa a distrito, kasta met dagiti umili a nangipaay ti suporta kenkuana tapno agballigi iti kalepleppas nga eleksyon.
