LAOAG CITY – Gutgutiguten ni Engr. Shiela Opelac, ti mangidadaulo ti City Agriculture Office ditoy ciudad ti Laoag dagiti addaan ti dingwen a mangala da ti livestock insurance.
Inbatad ni Opelac a ti livestock insurance ket makatulong kadagiti adda taraken na a dingwen gapu ta no adda dagiti saan a mapakpakadaan a pasamak a pakaapektaran dagitoy ket adda ti maawat da a tulong manipod iti Philippine Crop Insurance Corporation.
Inlawlawag na nga iti Philippine Crop Insurance Corporation a malaksid iti crops, livestock, fisheries ken iti mangmanged iti agrikultura ket masakupan na payen dagiti agtartaraken ti nagduduma ti klase na a dingwen kas ti baboy, baka , kalding, manok ken dadduma pay.
Kunana a makaawat dagiti maseknan ti tulong manipod iti Philippine Crop Insurance Corporation basta nakarehistro da iti Registry System for the Basic Sectors in Agriculture wenno RSBA.
Kabayatanna, inpasigirado ti City Agriculture Office a makaanay ti produksyon ti agrilultura ditoy ciudad gapu iti kinaanos ken kinagaget dagiti mangalap ken mannalon.
