LAOAG CITY – Nagkita da US President Donald Trump ken ni Syrian interim President Ahmed al-Sharaa idiay Saudi Arabia.
Ti apagbiit a panagtaripnong da Trump ken al-Sharaa ket naiyuswat kalpasan nga inikkat ti Estados Unidos ti sanctions nga inpataw na iti Syria.
Inlawlawag ni Trump a ti nagbalin nga addang na ket mangipaay ti gundaway iti Syria tapno mangabarwanan.
Maipalagip a pinatawan ti Estados Unidos ti sanctions ti Syria addan sumagmamano a dekada gapu ti panangsupsuporta ti nadakamat a pagilian ti terorista na grupo nga Hezbollah ken dadduma pay a grupo.
Naamoan a kalpasan dagiti inatendaran a taripnong ni Trump idiay Riyadh ket sumaruno a turungen na iti Qatar para ti four-day Middle East visit na.
