LAOAG CITY – Kinumpirmaran ni Engr. Tere Bacnat iti Provincial Agriculture Office nga adda dagiti sumagmamano a mannalon nga agamak nga agmula ti bawang gapu iti nababa a presyo.
Inlawlawag na a no ado dagiti agmula ket nababa ti presyo ti produkto rason a saan da a maabrot ti nagpuunan da, idinto a no bassit laeng ti agmula ti bawang ket nangina met ti presyo na.
Nupay kasta, inpasigurado ni Bacnat a saan nga apektado ti supply ti nasao a produkto ditoy probinsia gapu ta adda dagiti imported a bawang tapno saan nga ad-adda a ngumato ti presyo.
Kabayatanna, inbatad ni Ms. Cecil Sambrano, ti Municipal Agriculturist iti ili ti San Nicolas a dati ket 100 nga ektarya ti mamulmulaan ti bawang iti nasao nga ili ngem ita ket 50 nga ektarya laengen.
Kunana nga agamak dagiti mannalon amangan no maperdi dagiti mula da a bawang ken saan da a mapasubli ti puunan da agsipud ta agperdi dagitoy gapu kadagiti peste.
Naamoan nga iti agdama ket umabot ti 300 a pisos iti kada kilo ti bawang iti merkado.
