LAOAG CITY – Opisyalen nga inawan ni Pope Leo XIV ti ”Ring of the Fisherman” wenno Piscatory Ring, a simbolo ti kinabileg ti Santo Papa kas successor wenno mangisuno ken ni San Pedro.
Naaramid ti nasao a seremonya kalpasan ti Mass of Inauguration idi kalman, Mayo 18, iti St. Peter’s Square.
Ti singsing ket insuot kenkuana ni Cardinal Luis Antonio Tagle, Pro-Prefect ti Dicastery for Evangelization.
Naamoan a ti panangawat ti singsing ket maysa kadagiti kangrunaan a paset ti panangrugi ti maysa a baro a santo papa, ken maibilang a pakasaritaan a senyales ti panangibaklay na amin a responsibilidad iti Simbaan Katolika.
Mangiladawan ti singsing ken ni San Pedro, ken mangipasimudaag ti responsibilidad na kas santo Papa no sadinno a basar iti Mateo 16:19, naipaay ken ni Pedro ang dagiti tulbek ti Pagarian ti Langit, ken iti Lucas 22:32, inbilin kenkuana ni Hesus a papigsaen ti pammati dagiti kakabsatna.
Ti Piscatory Ring, a nangrugi idi maika-13 a siglo, ket us-usaren kas signet ring iti panag-seal kadagiti opisyal a dokumento agingga iti 1842, ngem ita ket us-usaren laeng iti seremonyal a wagas.
Iti kada Santo Papa ket addaan ti bukod a naidumduma a singsing ken no matay ti papa ket dadaelen daytoy tapno saanen a mausar manen.
Ti singsing ni Pope Leo XIV ket mangipakpakita ken ni San Pedro nga addaan kadagiti tulbek ken net kas simbolo iti panangitultuloy ti misyon nga inbati kenkuana ni Kristo.
