LAOAG CITY – Ikonkonsiderar ti Senado nga aramiden nga uppat a tawen ti termino wenno panagserbi dagiti Barangay ken Sangguniang Kabataan officials iti kanito a matuloy ti eleksion inton Disiembre.
Segun ken ni Senate President Francis Escudero, karaman daytoy kadagiti natalantan iti taripnong ti Legislative Executive Development Advisory Council (LEDAC) nga inatendaran ni Presidente Ferdinand Marcos Jr., dagiti senador ken kongresista.
Iti gakat ti Senado, aramidenda nga uppat a tawen ti panagserbi dagiti Barangay ken Sangguniang Kabataan officials idinto nga iti gagem ti Kamara ket innem a tawen met.
Nupay kasta, pagbubutosan pay daytoy ti Senado ken Kamara.
Immunan a nagturong iti Senado ni Naga City Mayor-elect Leni Robredo kaduana dagiti kapitan ti lugar no sadinno nga indanonda ken kiniddawda a saan a matuloy ti eleksion ita a tawen gapu ta awan pay ti tallo a tawen a nagserbi iti serbisio dagiti agdama a nakatugaw iti Barangay ken Sangguniang Kabataan.
