LAOAG CITY – Inbilin ni Presidente Ferdinand Marcos Jr. iti Department of Health (DOH) a solusyunan ti ngumatngato a kaso ti Human Immunodeficiency Virus wenno HIV iti pagilian.
Segun ken ni Health Secretary Ted Herbosa, naiget ti pammilin ni Presidente Marcos nga iyalisto ti pannakaipaay ti serbisyo iti babaen ti al-alisto a proseso kadagiti kangrunaan nga ospital a pagturungan dagiti indibidwal nga agbibiag nga addaan ti Human Immunodeficiency Virus.
Inpetteng ti sekretaryo nga iti babaen ti nasao a sistema ket masigurado a regular a makapag-pakonsultar dagiti addaan ti nasao a sakit.
Paigetan pay ti Department of Health ti kampanya da nga iwalin iti panunot dagiti umili ti stigma ti maaddaan ti Human Immunodeficiency Virus.
Basar iti datos ti Department of Health, adda ti 57 a kaso ti mairekrekord iti kada aldaw sipud idi Enero agingga idi Marso wenno iti umuna a kwarter ita a tawen.
Kuna ni Herbosa nga iti agdama ket addan dagiti agas iti nasao a sakit ken saanen a makapatay daytoy basta regular ti panagpakonsultar ken panaginom ti agas.
Gapu iti daytoy, inrakurak ni Herbosa a paigetan pay ti Department of Health ti panangipaay ti libre nga anti-retroviral wenno ARV drugs kadagiti indibidwal nga agbibiag nga addaan ti Human Immunodeficiency Virus.
Kabayatanna, inpalgak ni Herbosa a panawen metten tapno amendaran ti linteg tapno malabanan ti Human Immunodeficiency Virus.
