LAOAG CITY – Nagpanawagan ni Presidente Ferdinand Marcos Jr., a labanan iti fake news, saan nga usto nga impormasyon ken awan patinggana a kinaulbud gapu ta daytoy ti pudno a sakit wenno problema iti wayawaya dagiti Pilipino.
Inrakurak daytoy ni Presidente Marcos kabayatan iti selebrasyon ti maika-127 nga Independence day no sadinno a ti wayawaya a sagsagrapen iti agdama dagiti Pilipino ket gapu kadagiti sakripisyo dagiti banuar.
Gapu iti daytoy, kuna ti presidente a rumbeng laeng nga itultuloy nga ilaban ti sagsagrapen a wayawaya iti baet dagiti karit a sangsangwen ti Pilipinas iti agdama.
Inpaganetget ni Marcos nga iti babaen ti Bagong Pilipinas, nawaya ken saanen a maibilang a basol ti panangiyebkas ti opinyon ken kritisismo.
Kas pammaneknek, kuna ti presidente a daytoy ti mangbibiag ken mangipapaay ti kinasileng iti demokrasya ti pagilian.
Innayon na a ti laeng problema ket kasingin ti kinawaya iti panagirakurak ket ti pannakaiwaras dagiti peke a damag ken saan nga usto nga impormasyon.
Inpetteng ti presidente a no kitkitaen ti mapaspasamak iti lubong, ti panagraira ti saan nga usto nga impormasyon ket makaapektar iti panagbiag ti maysa nga indibidual, iti kultura, ken values nga iggem ti pagilian.
Inpalgak na pay a nakaladladingit gapu ta adda dagiti Pilipino nga ipilpilit da ti saan nga umiso a pammati para iti interest ti sabali ken saan a para iti pagsayaatan dagiti Pilipino.
Gapu iti daytoy, binalakadan ti presidente ti publiko nga agbalin a naridam, amwen ti kinapudno ken labanan ti kinaulbud no sadinno nga inyarigna iti ayat a ti wayawaya ken demokrasya ket masapol a taripatwen, bantayan ken ilaban.
