LAOAG CITY – Inrakurak ni Senate Impeachment Court Spokesperson Atty. Reginald Tongol nga awan ti pangibasaran ti akusasion a nabayagen wenno “foot dragging” ti proseso ti impeachment.
Inpannakkel ni Tongol nga adu ti naaramid ti korte iti uneg laeng ti maysa a lawas pakairamanan ti panag-convene ti impeachment court, panagiyisyu ti orders iti panangadaptar ti rules ken suppletory rules, panangibilin ti Kamara nga ag-comply iti isyu ti hurisdiksion, panagiyisyu ti summons ken ni Vice President Sara Duterte ken panangawat ti entry of appearance dagiti defense lawyers.
Inbatadna nga asinoman nga abugado wenno nasirib iti linteg ket alisto laeng ti mangipila ti motion for clarification, manifestation, compliance ken entry of appearance.
Nupay kasta, kukuestionaren ti impeachment court nga iti napalabas a pito nga aldaw sipod idi nag-convene ti Korte ket awan latta ti naipilpila agingga ita a pleading wenno aniaman a kidkiddawen a dokumento manipud kadagiti mangibagbaga a kalikagumda a maiyalisto ti proseso.
Innayon ni Tongol, kadagiti kastoy a babassit a mosyon ket nabayagdan nga agtignay kasanonto laengen iti dakdakkel a mosyon.
