LAOAG CITY – Nagtitipon dagiti sumagmamano a Pilipino idiay Oklahoma City, USA tapno agbuya iti Game 7 ti National Basketball Association Finals ita nga aldaw.
Segun kadagiti agasawa a da Bombo International News Correspondent Ben ken Vangie Vilog, gapu ta nangina ti ticket ken dupudop dagiti tattao a napan nagbuya iti Paycom Center idiay Oklahoma City ket pinilida nga agbuya lattan iti pagtaenganda kaduada ti sibubukel a pamiliada.
Inbatad ni Mrs. Vilog nga adda dagiti sumagmamano a saanen a simrek iti pagtrabahoan, nagrikep kadagiti pasdek negosio ken nasapa a nagawid manipud iti opisina wenno pagadalan tapno laeng maimatangan ti laban iti nagbaetan ti Indiana Pacers ken Oklahoma City Thunder.
Inlawlawagna a manmano pay dagiti lugan a nakita a dimmalyasat kadagiti kalsada gapu ta kaaduan kadagitoy ket timmutok iti NBA Finals.
Mainaig iti daytoy, inpakaammo ni Mr. Vilog nga adda ti maiyuswat a victory parade iti intero nga Oklahoma City kas panangrambak iti panagballigi ti Thunder.
Innayonna a naruay a fans ti Thunder ti naanus a nagpila kadagiti establishimento tapno gumatang kadagiti t-shirts ti Oklahoma City Thunder.
