LAOAG CITY – Naragsak nga inpakaammo ti maysa nga ina a ni Mrs. Chona Butay ditoy siudad ti Laoag a nakapagpaturpos ti kolehio ti maysa kadagiti tallo nga annakna babaen ti panaglakona kadagiti street foods.
Segun kenkuana, daytoy ti pammaneknek a saan a tubeng iti kinarigat ti panagbiag tapno saan a magun-od ti arapaap iti panagbiag.
Inbatadna a saan man daytoy a nakaturpos iti panagadal ket aramidenna ti amin a kabaelanna tapno makaturpos dagiti annakna.
Kunana a pudno a narigat no saan a makaadal gapu ta limitado laeng ti mabalin a pagaplikaran ti trabaho.
Nupay kasta, inlawlawagna a babaen ti anus ken diskarte ket nakabiruk ti pamastrekan kas ti panaglako kadagiti street foods nga isu ti pangal-alaanna ti gastosenna para iti inaldaw-aldaw a kasapulanda iti biag.
Inpettengna a nabara man ti panawen wenno agtudtudo ket masapul latta a bumangon daytoy iti nasapa a paset ti bigat tapno mapan aglako.
Mainaig iti daytoy, uray laeng nakalua ni Mrs. Butay kagiddan ti panangibalikasna nga iti baet nga isuda ket marigrigat ket ibilangna ti bagina a nabaknang gapu kadagiti pammadayaw dagiti annakna nga in-inot a magun-od dagiti arapaapda.
Naammoan a dagiti ilaklako nga street foods ni Butay ket dagiti bananaque, lumpia ken dadduma pay iti nalaka a presio isu a biruk-biruken met dagiti kustomerda.
