LAOAG CITY – Natay ti 11 nga indibidual ken 567 ti naarestar gapu iti naiwayat a tignay protesta idiay Kenya basar iti Kenya National Commission on Human Rights.
Nangipurwak ti tear gas ti kapulisan tapno tumalaw dagiti mangiwaywayat ti tignay protesta iti central Nairobi.
Segun ken ni Dr. Aron Sikuku, medic ken Eagle Nursing Home ti Nairobi, naitaray ti dua nga indibidual iti ospital kalpasan a napaltogan dagitoy.
Inbatadna a nagtitipon iti ruar ti ospital ti ginasut a mangiwaywayat ti tignay protesta kagiddan ti panangipukkawda nga iruar ti bagi dagiti maseknan nga indibidual.
Mainaig iti daytoy, adda ti 52 a pulis ken 11 a sibilian ti nasugatan gapu iti insidente.
Naruay dagiti pasahero ken motorista ti na-stranded iti checkpoints nga agatiddog ti 10 a kilometro manipud iti sentro ken sumagmamano laeng a lugan ti mapalubusan a dumalyasat.
Naammoan a ti naiwayat a tignay protesta ket maaw-awagan kas “Saba Saba” a daytoy ket napateg para iti pakasaritaan iti pagilian a Kenya.
Kabayatanna, inabisoan dagiti sumagmamano a pagadalan dagiti estudiante dagitoy nga agtalinaed pay laeng kadagiti pagtaenganda.
