LAOAG CITY – Adda ti sumagmamano a kondision nga indatag ni Israeli Prime Minister Benjamin Netanyahu tapno agtungpal iti ceasefire deal-da ti Hamas.
Inbatadna a nakasagana ti Israel iti nailungalong nga 60 nga aldaw a ceasefire ngem kasapulan a naan-anay nga agbalin a demilitarized ti Gaza.
Iti panangrugi mismo ti ceasefire ket insigida a sumrek iti negosasion para iti naan-anay a permanente a panaglippas ti gubat.
Naammoan a ti sumagmamano a kondision daytoy ket nasken nga ikkaten ti Hamas dagiti armasda ken saanen a maaddaanda pay ti puesto wenno kabaelan a mangbukel ti grupo.
Maipalagip a bimmisita ni Netanyahu iti White House ken personal daytoy a nakitaripnong ken ni United States President Donald Trump.
Kabayatanna, ti Estados Unidos ti kangrunaan a mangilunglungalong iti panagngudo ti rinnupak a nangrugi pay idi Oktubre 2023.
