LAOAG CITY – Nagballigi ti naisayangkat a Turnover Command Ceremony para iti incoming ken outgoing Provincial Director iti Ilocos Norte Police Provincial Office.
Ti nasao nga aktibidad ket inatendaran ni Governor Cecilia Araneta-Marcos.
Ni Outgoing Acting Provincial Director Police Col Orly Pagaduan ket maikabil iti Philippine National Police-Regional Office 1 tapno agserbi kas mangidaulo iti Regional Personnel and Records Management Division.
Naamoan a ti nasao a posisyon ket isu ti iggem ni Incoming Provincial Director Pol Col Joemar Labiano.
Mainaig iti daytoy, iti panagbitla ni Pagaduan ken nagyaman iti panagserbi na ditoy probinsya iti uneg ti 28 nga aldaw no sadinno nga iti baet nga awan pay makabolan a nagtakem kas Acting Provincial Director ket adda met dagiti naipatungpal na a pagannurutan tapno agtalinaed ti linak, urnus ken talna ditoy probinsya.
Inkari met ni Pol Col Labiano a suportaran na dagiti pagannurutan nga ipatpatungpal ti gobierno probinsyal ken ti Philippine National Police para iti pagsayaatan ditoy probinsya.
Maipalagip a ni Labiano ket immunan a nagserbi kas chief of police ditoy ciudad ti Laoag.
