LAOAG CITY – Inbatad ti Provincial Health Office a ti kangrunaan a natamaan ti leptospirosi ket dagiti mannalon ditoy probinsya.
Segun ken Dr. Rickson Balalio, mangidadaulo ti Provincial Health Office, umaboten ti 20 ti kaso ti nasao a sakit ditoy probinsia.
Kunana a basar iti datos manipod idi bulan ti Enero agingga iti Hulyo 31 iti agdama a tawen, dagiti mannalon a naapektaran ti sakit a leptospirosis ket naggapu iti ciudad ti Laoag, iti ili ti Bacarra, Pagudoud, Pasuquin, Vintar, Banna, Currimao, Dingras, Marcos, Nueva Era, San Nicolas ken iti ciudad ti Batac.
Inpakaammo ni Balalio nga adda ti libre nga agas a mabalin a dawaten dagiti umili iti Municipal Health Office iti bukod da a lugar tapno maprebentaran ti impeksyon.
Kunana a saan a kasapulan ti inaldaw a panagtumar ti agas no di ket umanayen iti maminsan iti kada lawas.
Mainaig iti daytoy, nagballaag ni Balalio a no makapaspasar kadagiti sintomas kas iti panag-gurigor, impeksyon, panag-yellow ti mata, ken dadduma pay, nasaysayaat no agturong a dagus iti kaasitgan nga ospital tapno agpakonsultar iti doktor sakbay a kumaro daytoy.
Innayon na a daytoy ti maysa kadagiti agtultuloy nga imonmonitor ti Provincial Health Office nangruna ket agtultuloy paylaeng a makapaspasar ti probinsia iti panagtudtudo.
