LAOAG CITY – Naitampok dagiti nagduduma a putahe usar dagiti nasustansiya a ramen kabayatan ti selebrasyon ti maika-51 a Nutrition Month.
Daytoy ti inpakaammo ni Engr.Sheila Opelac, ti mangidadaulo iti City Agriculture Office ditoy ciudad ti Laoag.
Ti nasao nga aktibidad ket naiyuswat iti Laoag City Multi-purpose Cooperative a nakipartisiparan dagiti Rural Improvement Club, Brgy Nutrition Scholars ken 4h Club.
Inlawalawg na a daytoy ket maysa a kompetisyon iti panagluto usar iti karne ti baboy, rabong ken saba a dippig kas kangrunaan a mausar iti pannakapartuat kadagiti nagduduma a recipe.
Kunana a ti nasao nga aktibidad ket mangipakita iti agtultuloy a panangitandudo iti Agri-tourism ti gobierno lokal wenno dagiti banag a mabalin a pagbalinen a nayon a pamastrekan dagiti residente ditoy ciudad.
Innayon na a gagem pay ti aktbidad ti nasalun-at ken naregregta nga umili gapo metlaeng kadagiti nasustansiya a makan.
Malaksid iti daytoy, nagrampa pay dagiti day care pupils a nakaarwat kadagiti naarkusan ti nagduduma a klase ti nateng ken prutas.
