LAOAG CITY – Dinadael ti tallo a menor de edad ti backhoe a naka-parking iti maar-aramid a kalsada iti Barangay Paayas iti ili ti Burgos.
Segun ken ni P/Capt. Jenny Lingan, Hepe ti Burgos Municipal Police Station, dagiti maseknan a menor de edad ket agtawen ti 12 agingga iti 13.
Inbatadna nga adda ti nagbalin a katulagan ti head operator ti backhoe ken dagiti nagannak dagiti nasao nga agtutubo nga ipatarimaanda daytoy.
Inlawlawagna a napasukatan ti sarming ti backhoe kalpasan a binuog dagiti menor de edad.
Kunana a dumanon iti 40 a ribu a pisos ti balor iti pannakadadael ti backhoe ngem nagpakaasi dagiti nagannak a dagitoy ti mapan agbiruk ken gumatang kadagiti kasapulan iti heavy equipment.
Mainaig iti daytoy, inpakaammo ni P/Capt. Lingan a dagiti dua nga agtawen ti 13 ket kinargaanda ti narugit a danum iti tangke ti backhoe idinto a ti agtawen ti 12 ket binakalna ti sarming ti backhoe.
Inpalgakna a napasamak ti insidente kalpasan ti klase dagiti menor de edad iti Davila National High School.
Innayonna a dua a backhoe ti nadadael ngem gapu ta maasian ti head operator kadagiti nagannak dagiti agtutubo ket ti barbaro a backhoe ti pabayadanna laeng.
