LAOAG CITY – Inlawlawag ti Provincial Health Office a saan ton a makaakar ti virus dagiti nagpositibo ti Human Immunodeficiency Virus laketdi agtultuloy ti panagtumar dagiti pasyente.
Segun ken Dr. Rickson Balalio, ti mangidadaulo iti Provincial Health Office, saanen a makaakar ti virus ti maysa nga indibidual no nababa ti viral load daytoy wenno agbalin nga ‘undetected’ ti virus kadakuada.
Inpakaammo na a maysa latta ti Human Immunodeficiency Virus kadagiti kangrunaan nga isyu a makapaalarma iti benneg ti salun-at ditoy probinsia.
Gapu iti daytoy, agtultuloy ti pananggutigot ni Balalio iti publiko nga amwen ti estado da maipanggep iti nasao a virus babaen iti panagpa-screen dagitoy.
Innayon na nga adda ti libre nga agas a maipaay kadakuada ken silulukat dagiti treatment hub ditoy probinsia, kas iti Mariano Marcos Memorial Hospital and Medical Center iti ciudad ti Batac.
Inbatad na pay a dagiti agtawen ti 15 agingga iti 24 ti kaadoan nga agpospositibo iti sakit, partikular dagiti lallaki a makinanaig iti pada da a lalaki.
