LAOAG CITY – Agtultuloy ti panagsagsagana ti Laoag Sports Office para iti pannakaisayangkat ti inter-school intono Setyembre ita a tawen.
Daytoy ti inbatad ni Mr. Hipolito Salva Jr., ti mangidadaulo iti Laoag Sports Office.
Segun ken ni Salva, manarimaan ti pannakikoordinar da iti Department of Education para kadagiti nagduduma a programa nga isayangkat da iti inter-school.
Kuna na a ti orihinal a petsa a pannakaisayangkat koma ti inter-school ket intono Agosto 23 ngem gapu iti epekto dagiti nagsasaruno a bagyo ken namin-ado a nasuspenso ti klase ket napagnunumoan da nga iyuswat laengen ti aktibidad mangrugi intono Setyembre 6 ken agpaot ti walo a lawas.
Innayon na nga iti inter-school ket awan ti maideklarar nga overall champion no di ket ti mangabak iti kada ay-ayam ket isuda laeng ti maipaayan ti pammadayaw.
Mainaig iti daytoy, inpakaammo ni Salva a ti cash prizea maipaay para kadagiti atleta a makagun-od ti gold medal ket P1,500; ti silver medal ket P1,000.00 idinto a ti bronze medal ket P500.00
