LAOAG CITY – Balligi a naisayangkat ti Memorandum of Agreement Signing iti nagbaetan ti City Government of Laoag ken Pacific Paint Boysen Philippine Inc. para iti pannakapabaro iti pinta iti Laoag City General Hospital ken ti Laoag City Public Market and Commercial Complex.
Segun ken ni Mayor James Bryan Alcid, awan pay ti naikeddeng nga aldaw a panangrugi iti pananakapabaro iti pinta dagitoy ngem apaman a pumintas ti paniempo ket manamnama nga insigida mairugi.
Inbatadna a malaksid iti daytoy ket maipabaro pay iti pinta ti tiendaan ken maigiddan ti retrofitting tapno maminsan amin a maaramid ken malpas iti pannakaplastar ti tiendaan.
Kunana nga agmaris ti puraw iti tiendaan nga addan ti earth tone-na idinto nga iti Laoag City General Hospital ket puro a puraw iti marisna.
Maipalagip nga ibaklay ti kompania dagiti amin a magastos a kasapulan para iti pannakapapintas ken pannakapasayaat ti Laoag City General Hospital.
